- March 10 , 2026
- Calicut
പാരാമെഡിക്കൽ പഠനത്തിൽ അടിമുടി മാറ്റം: 2026 മുതൽ രാജ്യത്ത് 'ഒരേ പേര്, ഒരേ നിയമം' - രക്ഷിതാക്കളും വിദ്യാർത്ഥികളും അറിയേണ്ടത്
ഇന്ത്യയിലെ ആരോഗ്യ വിദ്യാഭ്യാസ രംഗത്ത് ഒരു നിശബ്ദ വിപ്ലവം നടക്കുകയാണ്. വർഷങ്ങളായി നിലനിന്നിരുന്ന ആശയക്കുഴപ്പങ്ങൾക്കും അനിശ്ചിതത്വങ്ങൾക്കും വിരാമമിട്ടുകൊണ്ട്, 2026-27 അക്കാദമിക് വർഷം മുതൽ അലൈഡ് ഹെൽത്ത് സയൻസ് (പാരാമെഡിക്കൽ) കോഴ്സുകൾക്ക് രാജ്യമൊട്ടാകെ ഏകീകൃത രൂപം വരികയാണ്. നാഷണൽ കമ്മീഷൻ ഫോർ അലൈഡ് ആൻഡ് ഹെൽത്ത് കെയർ പ്രൊഫഷൻസ് (NCAHP) ആണ് ഈ പുതിയ ചട്ടക്കൂട് തയ്യാറാക്കിയിരിക്കുന്നത്. ഇനി പാരാമെഡിക്കൽ എന് കോഴ്സുകൾ അറിയപ്പെടില്ല.
ഇനി മുതൽ കാസർഗോഡ് മുതൽ കന്യാകുമാരി വരെയും, ഗുജറാത്ത് മുതൽ അരുണാചൽ വരെയും ഒരേ കോഴ്സിന് ഒരേ പേരും, ഒരേ സിലബസും, ഒരേ പ്രവേശന മാനദണ്ഡവും ആയിരിക്കും. യു.ജി.സി (UGC) ഇക്കാര്യം കർശനമായി നടപ്പിലാക്കാൻ സർവകലാശാലകൾക്ക് നിർദ്ദേശം നൽകിക്കഴിഞ്ഞു.
എം.ബി.ബി.എസിന് അപ്പുറം കരിയർ സ്വപ്നം കാണുന്ന ആയിരക്കണക്കിന് വിദ്യാർത്ഥികൾ അറിഞ്ഞിരിക്കേണ്ട സുപ്രധാന മാറ്റങ്ങൾ നമുക്ക് വിശദമായി പരിശോധിക്കാം.
1. ഫിസിയോതെറാപ്പി & ഒക്യുപേഷണൽ തെറാപ്പി: 'നീറ്റ്' എന്ന കടമ്പ
- ഏറ്റവും വലിയ മാറ്റം വന്നിരിക്കുന്നത് ഏറെ ഡിമാൻഡുള്ള ഫിസിയോതെറാപ്പി, ഒക്യുപേഷണൽ തെറാപ്പി കോഴ്സുകളിലാണ്.
- ഫിസിയോതെറാപ്പി (B.PT): 4.5 വർഷമായിരുന്ന കോഴ്സ് ഇനി മുതൽ 5 വർഷമാണ് (4 വർഷം പഠനവും 1 വർഷം ഇന്റേൺഷിപ്പും).
- ഒക്യുപേഷണൽ തെറാപ്പി (B.OT): ഇതിനും 5 വർഷമാണ് കാലാവധി (4 വർഷം + 1 വർഷം ഇന്റേൺഷിപ്പ്).
- അഡ്മിഷൻ ട്വിസ്റ്റ്: ഈ രണ്ട് കോഴ്സുകൾക്കും പ്രവേശനം ലഭിക്കാൻ വിദ്യാർത്ഥി NEET പരീക്ഷ എഴുതിയിരിക്കണം (Appeared) എന്നത് നിർബന്ധമാണ്.
- ആശ്വാസവാർത്ത: എം.ബി.ബി.എസിന് വേണ്ടത് പോലെ ഉയർന്ന നീറ്റ് സ്കോറോ, നിശ്ചിത കട്ട്-ഓഫ് മാർക്കോ ഇതിന് ആവശ്യമില്ല. പരീക്ഷ എഴുതിയിരിക്കണം എന്ന് മാത്രമേ നിബന്ധനയുള്ളൂ. അഡ്മിഷൻ നടക്കുന്നത് പ്ലസ് ടു മാർക്കും നീറ്റ് സ്കോറും പരിഗണിച്ചുള്ള മെറിറ്റ് അടിസ്ഥാനത്തിലായിരിക്കും. പ്ലസ് ടു സയൻസിൽ (PCB) 50% മാർക്ക് നിർബന്ധമാണ്.
2. മെഡിക്കൽ ലബോറട്ടറി സയൻസ് (B.MLS)
- പഴയ B.Sc MLT എന്ന പേര് വിസ്മൃതിയിലാകുന്നു. ഇനി മുതൽ ഇത് 'ബാച്ചിലർ ഓഫ് മെഡിക്കൽ ലബോറട്ടറി സയൻസ്' (B.MLS) ആണ്.
- മാറ്റം: 4 വർഷമാണ് കാലാവധി. സെമസ്റ്റർ രീതിയിലാണ് പഠനം.
- യോഗ്യത: പ്ലസ് ടു സയൻസിൽ ഫിസിക്സ്, കെമിസ്ട്രി, ബയോളജി (Botany + Zoology) പഠിച്ചവർക്ക് അപേക്ഷിക്കാം.
3. കണ്ണിന്റെ കാര്യം (Optometry) - മാത്സ് കാർക്കും അവസരം!
- കണ്ണടകളുടെയും കാഴ്ചയുടെയും ശാസ്ത്രം പഠിക്കാൻ ആഗ്രഹിക്കുന്നവർക്ക് സന്തോഷവാർത്ത.
- പുതിയ പേര്: ബാച്ചിലർ ഓഫ് ഒപ്റ്റോമെട്രി (B.Optom).
- കാലാവധി: 5 വർഷം (4 വർഷം പഠനം + 1 വർഷം ഇന്റേൺഷിപ്പ്).
- പ്രത്യേകത: പ്ലസ് ടുവിന് ബയോളജി എടുക്കാത്തവർക്കും, അതായത് ഫിസിക്സ്, കെമിസ്ട്രി എന്നിവയ്ക്കൊപ്പം മാത്തമാറ്റിക്സ് (Mathematics) പഠിച്ചവർക്കും ഈ കോഴ്സിന് അപേക്ഷിക്കാം എന്നത് വലിയൊരു അവസരമാണ്.
4. റേഡിയോളജി & ഇമേജിംഗ് (X-ray, MRI, CT)
- കോഴ്സ്: ബാച്ചിലർ ഓഫ് മെഡിക്കൽ റേഡിയോളജി ആൻഡ് ഇമേജിംഗ് ടെക്നോളജി (B.MRIT).
- കാലാവധി: 4 വർഷം (3 വർഷം ക്ലാസ്സും 1 വർഷം ഇന്റേൺഷിപ്പും).
- റേഡിയോ തെറാപ്പി: കാൻസർ ചികിത്സാ രംഗത്തെ റേഡിയേഷൻ തെറാപ്പിക്ക് B.RTT എന്ന 4 വർഷ കോഴ്സ് (6 മാസം ഇന്റേൺഷിപ്പ് ഉൾപ്പെടെ) നിലവിൽ വരുന്നു.
5. ഓപ്പറേഷൻ തിയേറ്റർ & അനസ്തേഷ്യ
- പുതിയ പേര്: ബാച്ചിലർ ഓഫ് അനസ്തേഷ്യ ആൻഡ് ഓപ്പറേഷൻ തിയേറ്റർ ടെക്നോളജി (B.AOTT).
- കാലാവധി: 4 വർഷം.
- യോഗ്യത: ഇതിനും ഫിസിക്സ്, കെമിസ്ട്രി എന്നിവയ്ക്കൊപ്പം ബയോളജിയോ മാത്തമാറ്റിക്സോ ഉള്ളവർക്ക് അപേക്ഷിക്കാം.
6. സയൻസ് ഇല്ലാത്തവർക്കും 'ഡോക്ടർ'ക്കൊപ്പം ജോലി ചെയ്യാം!
- സയൻസ് ഗ്രൂപ്പ് എടുക്കാത്തതുകൊണ്ട് മെഡിക്കൽ രംഗം സ്വപ്നം കാണാൻ കഴിയാത്തവർക്ക് ആശ്വാസമാകുന്ന കോഴ്സുകളുണ്ട്.
- ഹെൽത്ത് ഇൻഫർമേഷൻ മാനേജ്മെന്റ് (B.Sc HIM): ആശുപത്രികളിലെ രോഗികളുടെ വിവരങ്ങളും റെക്കോർഡുകളും കൈകാര്യം ചെയ്യുന്ന നിർണ്ണായക ജോലി. 4 വർഷമാണ് കോഴ്സ്. സയൻസ് മാത്രമല്ല, കൊമേഴ്സ്, ആർട്സ് (ഇംഗ്ലീഷ് ഒരു വിഷയം ആയിരിക്കണം) കഴിഞ്ഞവർക്കും ഇതിന് ചേരാം.
- സോഷ്യൽ വർക്ക് (B.MPSW): 'ബാച്ചിലർ ഓഫ് മെഡിക്കൽ ആൻഡ് സൈക്യാട്രിക് സോഷ്യൽ വർക്ക്' എന്ന ഈ 4 വർഷ കോഴ്സിന് ഏത് സ്ട്രീം (Science/Commerce/Humanities) കഴിഞ്ഞവർക്കും അപേക്ഷിക്കാം.
- സൈക്കോളജി (B.Psy):*4 വർഷം നീളുന്ന ഈ കോഴ്സിന് സയൻസ്, ആർട്സ്, അല്ലെങ്കിൽ സൈക്കോളജി ഒരു വിഷയമായി പഠിച്ചവർക്ക് അപേക്ഷിക്കാം.
7. ന്യൂട്രീഷൻ & ഡയറ്ററ്റിക്സ്
- പുതിയ പേര്: ബാച്ചിലർ ഓഫ് ന്യൂട്രീഷൻ ആൻഡ് ഡയറ്ററ്റിക്സ് (ഓണേഴ്സ്).
- കാലാവധി: 4 വർഷം. ഇതിൽ 6 മാസം ക്ലിനിക്കൽ ട്രെയിനിംഗ് നിർബന്ധമാണ്.
8. മറ്റ് സ്പെഷ്യലൈസേഷനുകൾ
- ബാച്ചിലർ ഓഫ് എമർജൻസി മെഡിക്കൽ ടെക്നോളജിസ്റ്റ് (B.EMT): അത്യാഹിത വിഭാഗത്തിൽ (Casualty/Trauma) പ്രവർത്തിക്കാൻ 4 വർഷത്തെ കോഴ്സ്.
- ബാച്ചിലർ ഓഫ് ഫിസിഷ്യൻ അസോസിയേറ്റ് (B.PA): ഡോക്ടർമാരെ ക്ലിനിക്കൽ ജോലികളിൽ സഹായിക്കുന്ന 4 വർഷത്തെ കോഴ്സ്.
- ബാച്ചിലർ ഓഫ് റെസ്പിറേറ്ററി ടെക്നോളജി (B.RT): 4 വർഷം (3+1).
- ബാച്ചിലർ ഓഫ് ഡയാലിസിസ് തെറാപ്പി ടെക്നോളജി (B.DTT): 4 വർഷം.
പൊതുവായ കാര്യങ്ങൾ & നേട്ടങ്ങൾ
- 1. വയസ്സ്: അഡ്മിഷൻ എടുക്കുന്ന വർഷം ഡിസംബർ 31-ന് 17 വയസ്സ് പൂർത്തിയായിരിക്കണം.
- 2. ലാറ്ററൽ എൻട്രി (ഡിപ്ലോമക്കാർക്ക്): മുകളിൽ പറഞ്ഞ വിഷയങ്ങളിൽ ഡിപ്ലോമ (ഉദാഹരണത്തിന് D.MLT, D.OTT) കഴിഞ്ഞവർക്ക്, അതേ വിഷയത്തിലെ ഡിഗ്രി കോഴ്സിലേക്ക് നേരിട്ട് രണ്ടാം വർഷത്തിലേക്ക് (3rd Semester) പ്രവേശനം നേടാം. 10% സീറ്റുകൾ ഇതിനായി മാറ്റിവെക്കും.
- 3. വിദേശ പഠനവും ജോലിയും: നിലവിൽ 3 വർഷം കൊണ്ട് തീരുന്ന പല കോഴ്സുകളും ഇനി മുതൽ 4 വർഷമോ അതിൽ കൂടുതലോ ദൈർഘ്യമുള്ള 'ഓണേഴ്സ്' തുല്യമായ ഡിഗ്രികളായി മാറുകയാണ്. അമേരിക്ക, യുകെ, കാനഡ, ഓസ്ട്രേലിയ തുടങ്ങിയ രാജ്യങ്ങളിൽ ജോലിക്കും ഉപരിപഠനത്തിനും 4 വർഷ ബിരുദമാണ് പലപ്പോഴും ചോദിക്കാറുള്ളത്. ഈ മാറ്റം നമ്മുടെ കുട്ടികൾക്ക് വിദേശ അവസരങ്ങൾ വർദ്ധിപ്പിക്കും.
അതായത് 2026- വർഷം മുതൽ മെഡിക്കൽ അനുബന്ധ കോഴ്സുകൾക്ക് ചേരാൻ ഉദ്ദേശിക്കുന്നവർ പഴയ പേരുകളും (ഉദാഹരണത്തിന് വെറും B.Sc MLT) പഴയ കാലാവധിയും കണ്ട് തെറ്റിദ്ധരിക്കരുത്. NCAHP അംഗീകരിച്ച പുതിയ പേരിലുള്ള, 4 അല്ലെങ്കിൽ 5 വർഷ കാലാവധിയുള്ള കോഴ്സുകൾ തന്നെ തിരഞ്ഞെടുക്കാൻ ശ്രദ്ധിക്കുക. ഇത് നിങ്ങളുടെ ഭാവിക്കും വിദേശ തൊഴിൽ സാധ്യതകൾക്കും കരുത്തേകും. നിലവിൽ അനുഭവിക്കുന്ന കോഴ്സ് തുല്യതാ പ്രശ്നങ്ങൾക്ക് അവസാനമാകുകയും ചെയ്യും.
